BaladeN23.txt

Se quanque amours puet donner à amy
Et quanque cuer d'ami puet désirer
Et quanque dame y porroit mettre aussi
De bien, de pais, par loyaument amer,
Estoient entièrement
En un seul cuer, je say certeinnement
Qu'il sentiroit grief tristesse et esmay
Contre le bien et la joie que j'ay.

Car nulle fois de riens ne me defri,
Ne riens ne puet mon cuer desconforter,
Ains ay le temps si bon et si ouni
Que je ne puis à nulle riens penser
Fors à joie seulement ;
Et ce me fait vivre si liement
Que Leesse n'a cuer joieus ne gay
Contre le bien et la joie que j'ay.

Et tout pour ce que j'ay toudis en my
L'impression de ma dame sans per
Qui est empreinte et figurée en my
Mon loyal cuer qui l'aimme sans fausser
Si fort et si fermement
Qu'adès la voy vis à vis proprement ;
Ne se peut riens comparer, bien le say,
Contre le bien et la joie que j'ay.